மாயனின் மாயம்!

177

Get real time updates directly on you device, subscribe now.

ஓம் ஸ்ரீ ஈஸ்வர மஹா ஜோதியே சரணம்!

13•09•2016,
செவ்வாய்க்கிழமை,
குருஈஸ்வராலயம்,
பொள்ளாச்சி.

(66) மனிதனே புனிதன் —
மாயனின் மாயம்!
°°°°°°°°°°°°°°°°°°°°°°°°°°°°°°°°°°°°°°°
நாம் யாதொன்றை நேசிக்கத் துவங்குகின்றோமோ அப்போது தான் அதனைப் பற்றிய கவனித்தல் ஆரம்பமாகும். நம்முடைய வீட்டை நாம் நேசிக்கும் போது, அதனைப் பற்றிய நிறைகளும் தெளிவாகும். கவனித்தல் சக்தி அதிகரிக்க குழாயில் நீர் சொட்டிக் கொண்டிருக்கும், அதன் சப்தம் கூட கேட்கத் துவங்கும். இதனை ‘இல்லம் பேசுதல்’ என்பார்கள். வீட்டினில் ஏற்படும் சிறுசிறு சப்தங்களும் கேட்கும். நமது கவனிக்கும் சக்தி அதிகரித்துள்ளது, எதையும் நேசிக்கும் மனப்பான்மை வளர்ந்துள்ளது என்று தெரியும். அவைகள் அதிகரிக்கும் போதுதான் வீட்டில் ஏற்படும் பல குறைகளையும் நிவர்த்தி செய்து அதை எப்போதும் அழகாக வைத்துக் கொள்ளலாம்.

கவனித்தல் என்பது வாழ்க்கை நமக்குக் கற்றுக் கொடுக்கும் பால பாடமாகும். கவனிக்கும், நேசிக்கும் பாடத்தைப் படித்துப் பழகாதவர்களால் தங்களைக் காப்பாற்றிக் கொள்ள முடியாது. நாம் செய்யும் எந்தக் காரியங்களுக்கும் இந்தச் சக்திகள் உதவி புரியும். இதைத் தான் நமது சுவாமி செய்த செயல். குருநாதரை நேசிக்கும் தன்மை அவருள் வளரவளரக் கவனிக்கும் சக்தியும் வளர்ந்துள்ளது. பரிகாரப் பாடம் படித்தவர் அதனை குருநாதருக்காகச் செய்தால் உலகம் அனைத்திற்கும் கிடைக்கும், என்ற நம்பிக்கையும், நல்ல எண்ணமுமே அவரை அப்படி இயங்க வைத்தது.

இதனைப் புரிந்து கொள்ள வேண்டும். தகுந்த தன்னுடைய குருநாதனிடம் நெஞ்சார்ந்த நம்பிக்கை கொண்டு, மரியாதை செலுத்தி, அன்புடன் அவர் கூறும் வார்த்தைகளை ஏற்று, அதன்படியே நடந்து, ஒழுக்கமுடன் பயிற்சிகள் செய்து, குருவருளைப் பெற்றுத் திருவருள் சீக்கிரம் சித்தித்திட வாழும் வாழ்க்கையே தெய்வீகம் ஆகும். பிறவிப் பயனை அடைந்திடச் செய்யும் வழியுமாகும். நம்மால் நன்மை அடைந்தவர்கள் வாழ்த்தும் வாழ்த்தொலியும், தருமமும், அன்னதானச் சிறப்பும், அதனால் பெறும் ஆசியும், சேவைகள் புரிந்து கருணை உள்ளமுடனும், ஜீவகாருண்யமும் பூண்டு வாழ்ந்து வருபவர்கள், கடவுள் தன்மை அடைந்தவர்களின் சம்பாஷனைக்குத் தகுதி பெறுகின்றார்கள்.

தனது குருநாதரை உள்ளத்தில் வைத்து பூஜித்து வரும் சுவாமி அவர்கள், கோயில் மரத்தடியில் சித்தாசனமிட்டு அமர்ந்து தவத்தில் இருந்த குருநாதரைக் கண்டதும் திகைத்துப் போனார். காரணம் அவரின் தலையில் இருந்து நீர் வழிந்து உடல் எங்கும் பரவி தரையில் வழிந்து கொண்டிருந்தது. தனது அருமைச் சீடனைப் பார்க்கக் கண்விழித்த குருநாதர் புன்னகை புரிந்தார். அருகில் அமருமாறு சைகை புரிந்து விட்டுத் தவத்தில் மூழ்கி விட்டார். சுவாமியும் அவர் அருகே தியானத்தில் அமர்ந்திருந்தார். குருநாதர் கண்விழித்ததும் தான் கொணர்ந்த ஆகாரத்தைக் கொடுத்துச் சாப்பிட வைத்தார். பிறகு குருநாதர் இரவு வரை எதுவும் பேசாமல் மொளனமாக இருந்தார். கோயில் வாசல் சுவரில் சாய்ந்து கால்களை நீட்டிக் கொண்டார்.

மெளனத்தைக் கலைத்து விட்டு இரவில் பேசினார். “மகனே நாகராஜா எனக்காக நீ செய்த பரிகாரத்தை ஏற்றுக் கொண்டு விட்டேன். இந்த மலைக்குத் தன்னந்தனியனாக எந்த தைரியத்தில் வந்தாய்?” எனக் கேட்டார். நாகராஜன் சுவாமி மெளனம் சாதித்தார். “கூப்பிட்டால் நான் வந்து விடுவேன் என்பதாலா?”என்றார். சுவாமி தலைமை மட்டுமே ஆட்டினார். “நாகராஜா மாயனும் இயல்பாகவே நல்லவன்தான். வால்மீகி ரிஷி வனவேடன் குலத்தில் உதித்தவன். தனது குலதெய்வமான தாடகையை வதைக்க உதவியதால் ரிஷிகள் மீது தனது கோபத்தைக் காட்ட, அவர்கள் சக்தி ஆற்றலை உன்னைக் கொண்டே அடைய நினைத்தவன். நீ கூறிய வழிமுறைகளுக்கு வன தேவதைகள் ஆசி பெற்றே தீரவேண்டும். அவனால் இயலாமல் தற்கொலை செய்து கொண்டான். கடும் ஆவி மாந்திரீகனாக உலவி, தனது பிடிக்குள் அநேக ஆவிகளை வசப்படுத்தி, ராமர் வனம் போகும் பாதையில் உள்ள விஸ்வாமித்திரர் குகைக்குள் அடைத்து வைத்துள்ளான்.
தோப்புக்கு அருகில் செந்நெல்லி வனத்தின் பெரிய மேட்டில் உள்ள ஒற்றை மரத்தில் வாசம் செய்து வருகிறான். என்னைக்கண்டு விட்டு விலகிச் சென்று விட்டான். இனி எனது உத்தரவில்லாமல் விஸ்வாமித்திரர் யாககுண்டம் இருக்கும் வனத்தினுள் நுழைந்து விடாதே. என் மகனே உன்னால் உலகிற்கு ஒரு காரியம் நடை பெற வேண்டும். சமயம் வரும் போது சொல்கிறேன்” என்றார்.

சீடர் தனது குருநாதரிடம் பேசினார், ” ஈஸ்வர குருநாதா!
தாங்கள் பழனியில் வாழ்ந்தது, சமாதியில் அமர்ந்தது பற்றி அருள் கூர்ந்து தெரியப்படுத்த வேண்டும்” என்றார். அப்போது காட்டுப் பன்றிக் கூட்டம் மலையில் இருந்து கீழே இறங்கிக் கொண்டிருந்தன. வேர்க்கடலைப் பயிர்கள் நன்றாக விளைந்துள்ள காலம். அதனைச் சாப்பிட அவைகள் சென்றபின் சற்குருநாதர் பழனியில் தான் தவமிருந்த வரலாறு பற்றித் தெளிவாக எடுத்துரைத்தார்.
(வரலாறு இன்னும் வரும்)
நன்றி! வணக்கம்!

– ஸ்ரீ ஈஸ்வர குமாரரின் தொண்டன்!
மதுரை M.மேகநாதன் .


Copyright Warning:
* All images and materials are copyright protected and are the property of Guru Eswaralayam Charitable Trust. Please contact us at admin@gurueswaralayam.com for permission to use our copyrighted materials.
* Unauthorized use and/or duplication of these images and materials without written permission from this blog’s authors and owners is prohibited. Excerpts and links may be used, provided that credit is given to Guru Eswaralayam Charitable Trust, with appropriate and specific direction to the original content.

Get real time updates directly on you device, subscribe now.

Call Now Button