சேரர் கால வஞ்சியம்மன்!

203

Get real time updates directly on you device, subscribe now.

ஓம் ஸ்ரீ ஈஸ்வர மஹா ஜோதியே சரணம்!

16•09•2016,
வெள்ளிக்கிழமை,
குருஈஸ்வராலயம்,
பொள்ளாச்சி.

(69) மனிதனே புனிதன் —
சேரர் கால வஞ்சியம்மன்!
°°°°°°°°°°°°°°°°°°°°°°°°°°°°°°°°°°°°°°
சேர, சோழ, பாண்டியர்களாகிய தமிழ் மூவேந்தர்கள் ஆண்டு வந்த தமிழகத்தில், சேர மன்னன் கரூரைத் தனது தலைநகரமாகக் கொண்டு அரசாட்சி செய்து வந்தார். அவர்களது போர்க் கோலதேவதை வஞ்சியம்மன். வஞ்சினம் உடைய வஞ்சி என்ற கருத்தில் அந்த அம்மனை கண்ணகி என்றும் கிராமத்தில் கூறுவோரும் உண்டு! சேரர்கள் காலத்தில் வஞ்சியம்மன் வழிபாடு கரூர் தொடங்கி கொங்கு மண்டலம் எங்கும் பரவி இருந்தது. கிராமத்து வடக்குப் புறமாக ஈசான்ய பாகத்தில் அந்த தேவதைக்கு என்று சுற்றுச்சுவரும் கூரையும் கூடிய சிறிய கோயில் இருந்தது.
பெரிய இரண்டு இச்சிமரங்கள் ஓங்கி வளர்ந்து அருகில் மிகப் மழைநீர் செல்லும் பெரிய ஓடையும் இருந்தது. அங்கு செல்ல மக்களுக்கு அச்சம்! கோயிலைச் சுற்றிலும் அடர்ந்த வேலிகளில் அளிஞ்சில் மரங்கள் இருந்தன. அதற்குச் சிவந்த நிறமுடைய பழங்கள் கனிந்து பார்க்க அழகான காட்சியாகத் தென்படும். சுவாமி அங்கு தனது மூத்த பெரியப்பா மகன் அண்ணன் ராஜமாணிக்கம் அவர்களுடன் சென்று அளிஞ்சில் பழங்கள், சீனிப்புளிப் பழங்கள், ஈச்சம்பழம், காரைப்பழங்கள், பட்டணக் கள்ளிப் பழங்கள் என பருவகாலங்களில் கிடைக்கும் நுங்கு, சீதாப்பழங்கள் மற்றும் அத்திப்பழங்கள் என உண்டு வருவார். இயற்கை என்னும் கொடையாளியால், இலவசமாக அந்த கிராமத்திற்கு அழகை அள்ளி அள்ளி வழங்கியிருந்தது.

வாஞ்சி அம்மன் கோயில் அருகே மிகப் பெரிய ராஜநாகம் ஒன்று உலவி வரும். கோயில் பாழடைந்து போனதால் கிராமத்துப் பெரிய தனக்காரர் வஞ்சியப்பத்தேவர் என்பவர் முன்வந்து கோயிலை சுத்தம் செய்து விழாவும் எடுத்து சாமியும் ஆடி வந்தார். அவர் இரட்டை மாடுகள் பூட்டிய கட்டை வண்டியில் புறப்பட்டு ஆனைமலை அடிவாரத்தில் காய்ந்து போன மரங்களை வெட்டிக் கொணர்ந்து விறகு வியாபாரம் செய்து வந்தார். அக்காலத்தில் விறகு வெட்டிப் பிழைப்பவர்களுக்கு எவ்விதத் தடையும் இல்லை. மலைக்கு சென்று விறகு கொண்டு வரும்போது, மிருகங்களால் எவ்வித ஆபத்தும் தனக்கு நேர்ந்து விடக்கூடாது என்பதாக அவர் வழிபாடு இருக்கும். அதற்கான சிறிய வசனம் ஒன்று உண்டு. அது வஞ்சியம்மனைப் பார்த்துச் சொல்வதாக இருந்தது. ” ஆத்தா நீ செடி மேல! பக்தன் நா மல மேல!”
இது கிராமத்தில் பிரபல்யமாகி விட்டதால், அவரைக் கேலி செய்ய சிறு பிள்ளைகள் பாடும் பாட்டானது! அதைப் போலவே பெற்றோர்கள் குழந்தைகளைக் கண்டிக்கும் போதும் குழந்தைகள் அழுது கொண்டே இந்த வசனத்தைப் பாட்டாகப் பாடுவார்கள்., பெற்றோர்கள் உடனே சிரித்து தங்கள் குழந்தைகளை அரவணைத்துக் கொள்வார்கள்.

உள்ளூர் மயானத்துக்குப் போகும் பாதையில் வள்ளியம்மாள் என்பவருக்கு உரிய இருபது செண்ட் இடத்தில் மேடையும் அதன் மீது ஒரு கருங்கல் நடப்பட்டு பார்பர் தொழில் புரிவோர் வழிபட்டு வந்த இடத்தை ராஜநாகம் தனது இருப்பிடமாக்கிக் கொண்டது. அந்த கிராமம் அதிகமான சர்பங்கள் பிரியமாக வசிக்கும் இடமாக இருந்தது. கொஞ்ச காலத்தில் வள்ளி அம்மாள் இடத்திற்கு மேற்கு திசையில் பஞ்சாயத்து நிர்வாகத்திற்குச் சொந்தமாக இருந்த புளியந்தோப்பு இடத்தை ஆக்ரமித்து, வெளியூர்களில் இருந்து அம்பல நாயக்கன் பாளையம் வரும் மக்கள் குடியேறினர். பிறகு மெல்ல மெல்ல ராஜநாகம் வசித்த இடத்தையும் ஆக்ரமிக்க வள்ளியம்மாள் இடமும் பறிபோனது. ராஜநாகம் வசித்து வந்த இடத்தில் வீடுகட்டி வாழ்ந்து வந்தவர்களில் சிலர் முறைகேடான காரியங்களில் ஈடுபட, ராஜநாகம் அடிக்கடி தென் பட்டு, அவர்களைப் பயமுறுத்த ஆரம்பித்தது. அவர்கள் ஒன்று கூடி நமது காரியங்களுக்கு இந்தப்பாம்பு தடையாக இருப்பதால், அடித்துக் கொன்றுவிட முடிவு கட்டிப் பாம்புப் பிடாரனை அழைத்து வந்தனர். வந்த அவரும் ராஜநாகத்தைக் கண்டு பயந்து ஓடி விட்டார்.

ஒருநாள் வீட்டின் பின்புறம் அதன் நடமாட்டத்தைக் கண்டனர். அது அங்கே இருந்த பெரிய துவாரத்தினுள் நுழைவதைக் கண்டு பிடித்து, பெரிய விறகுகள் போட்டுத் தீ வைத்தனர். புகை நுழைய அவதியை அடைந்த சர்பம், வீட்டினுள் இருந்த மற்றொரு துவாரத்தில் வேகமாக வெளிப்பட்டு, வீட்டைத் தகர்த்து விட்டுக் கூரையின் மீது நின்று கோபப பார்வை பார்த்தது. அப்படி ஒரு மிகப் பெரிய ராஜநாகத்தையும், அதன் உருவத்தையும், கோபங்கொண்ட பார்வையையும், கிராமம் மறந்து போயிருக்கவே முடியாது. அதற்கு இன்னல் விளைவித்தவர்கள் ஊரைவிட்டு ஓடி மறைந்த விவரம் காலத்தில் அழியாதது. நன்றி! வணக்கம்!

(மனிதனே புனிதன் வரலாறு இன்னும் தொடர்ந்து வரும்)

— ஸ்ரீ ஈஸ்வர குமாரரின் தொண்டன்!
மதுரை M.மேகநாதன்.


Copyright Warning:
* All images and materials are copyright protected and are the property of Guru Eswaralayam Charitable Trust. Please contact us at admin@gurueswaralayam.com for permission to use our copyrighted materials.
* Unauthorized use and/or duplication of these images and materials without written permission from this blog’s authors and owners is prohibited. Excerpts and links may be used, provided that credit is given to Guru Eswaralayam Charitable Trust, with appropriate and specific direction to the original content.

Get real time updates directly on you device, subscribe now.

Call Now Button