ஊருக்கே நிம்மதி வந்தது!

223

Get real time updates directly on you device, subscribe now.

ஓம் ஸ்ரீ ஈஸ்வர மஹா ஜோதியே சரணம்!

06•10•2016,
வியாழக்கிழமை,
குரு ஈஸ்வராலயம்,
பொள்ளாச்சி.

(89) மனிதனே புனிதன் —
ஊருக்கே நிம்மதி வந்தது!
°°°°°°°°°°°°°°°°°°°°°°°°°°°°°°°°°°°°°°°
சுவாமியின் தகப்பனார் திரு. APMசாமி அவர்கள் தனது சைக்கிளில் உருட்டுத்தடி ஒன்றை வைத்துத் தள்ளியபடி, காவல் காபந்து செய்து கொண்டே, மூணார் செல்லும் சாலையில சென்று கொண்டிருந்தார். மண்டை வெட்டியானைப் பற்றிய எந்தத் தகவலும் இல்லை! என்ன ஆனான்? எங்கு போனான்? என்பதும் தெரிய வில்லை. ஆக ஆள் ஊருக்குள்ளும் காணப்பட வில்லை! மீசையை முறுக்கி விட்டபடியே உலவி வரும் அவனது அடியாட்கள் கூடவா மறைந்து போய் விட்டார்கள்? இதில் ஏதோ சூழ்ச்சி உள்ளது, என்பது மட்டும் புரிந்து விட்டது. அவருக்கு விரித்த வலையை நோக்கித் திரு.APM.சாமி சென்று கொண்டிருந்தார்.

அவர் சென்ற வழிகளில் உள்ள மரங்களின் மீதுதான், மண்டை வெட்டியானும் அவனது ஆட்களும் மறைந்திருந்தனர். அவரைக் கொல்வது மண்டை வெட்டியானின் உரிமை என அவர்களுக்குள் முடிவானது. எதற்கும் ஜாக்கிரதை உணர்வுடன் சென்று கொண்டிருந்தார். சிறிது நேரத்தில் சீழ்க்கை ஒலி அவருக்குப் பின்னால் மரத்தின் மீதிருந்து கேட்டது. பிறகு தொடர்ந்து பல இடங்களில் இருந்து கேட்கத் துவங்கியது. மனதில் பீதியை உருவாக்குவது அவர்களின் நோக்கமாக இருந்தது. தெளிவான சிந்தனையுடன் சுவாமியின் தந்தை காணப்பட்டார்.

சைக்கிளைப் பாதை ஓரமாக நிறுத்தி விட்டு, உருட்டுக் கம்பை எடுத்துக் கையில் மறைத்துக் கொண்டு நின்றிருந்தார். தலைக்கு மேல் சரசரவென்ற ஓசை கேட்கவும், தலை நிமிர்ந்து பார்த்தார். புளியங் கொம்புகளைப் பற்றியபடி மந்திபோல் தாவித்தாவி இறங்கிக் கொண்டிருந்தான் மண்டை வெட்டியான். அவனது கால்கள் இரண்டும் தனது தலைக்கருகே வரும் வரை கவனித்துக் கொண்டிருந்தவர், சரேலென விலகி நின்று கொண்டார். அவன் தனது இடது கையால் புளியமரம் கொம்பையா இறுகப்பற்றிக் கொண்டு, இடுப்பில் சொருகியிருந்த வீச்சரிவாளை எடுக்க முயன்றான். இது அவனது பழக்கம்.

திரு.APMசாமி அவர்கள் தனது கையில் மறைத்து வைத்திருந்த கம்பால், அவனது கணுக்கால் முன்பகுதியில் பலமாக ஒரு அடி எலும்பின் மீது போட்டு விட்டார். அடியின் அதிர்ச்சி தாளாமல் தன்னைப் பெற்ற அ ன்னை ஞாபகம் அன்றுதான் வந்ததுபோல் ‘அம்மா’ என்ற அலறித் தரையில் விழுந்தான்.
அவன் கையில் இருந்த ஆயுதத்தைப் பிடுங்கிக் கொண்டு, தான் கொண்டு வந்திருந்த கயிற்றால் அவனைக்கட்டிப் போட்டார். இதனை மரத்தின் மீதிருந்து கவனித்த அவனது அடியாட்கள் கூச்சலுடன் ஆவேசமாகக் கீழிறங்கினர்.

இவர் ஒருவர், அவர்களோ பத்துப்பேர்! என்ன செய்வது? அடுத்தகட்டப் போராட்டத்திற்கும் தயாராக, மண்டை வெட்டியானின் வீச்சரிவாளும், உருட்டுக்கட்டையுமாக, ஆவேசக் குரலில், “உயிர் மீது ஆசையில்லாதவன்கள் வாங்கடா” என்று கூறியபடியே பாய்ந்து விட்டார். சிலம்பம் சுற்று வது போல் சுற்றி நான்கைந்து பேரைக் காயப்படுத்தி விட்டார். “பெரியவர் தனியாகப் போயிருக்கிறார். அவர் கதை இன்றோடு முடிந்து விட்டது. இருங்கடா உங்களைக் கவனித்துக் கொள்கிறோம்” என்று மண்டை வெட்டியானின் ஒற்றுஆள் சொன்னதைக் கேட்டு, சிலம்பாட்ட வீரர்கள் பத்துபேர் சைக்கிள்களில் வேகமாகப் புறப்பட்டு வந்து சேர்ந்தனர்.

சண்டை மும்முரமாக நடை பெற்றது. தலைவனை விட்டு விட்டு அத்தனை அடியாட்களும் ஓடிப் போயினர். மயக்கம் தெளிந்த மண்டைவெட்டியானை போலீஸ் நிலையம் கொண்டு சேர்த்தனர். பலவருட காலங்கள் காவலர் கரங்களில் சிக்காமல் துன்பங்கள் தந்த அவன், காவலில் பிடித்துக் கொடுத்த திரு.APM சாமி ஐயா அவர்களைக் கையெடுத்துக் கும்பிட்டான். வீரன் வீரருக்கு மரியாதை செலுத்துவதைப் போன்று அது இருந்தது. பலரது பாராட்டுதல்களைப் பெற்ற அவரால் ஊருக்கே நிம்மதி வந்தது.

(மனிதனே புனிதன் வரலாறு தொடர்ந்து இன்னும் வரும்)

நன்றி! வணக்கம்!
— ஸ்ரீ ஈஸ்வர குமாரரின் தொண்டன்!
மதுரை M.மேகநாதன்.


Copyright Warning:
* All images and materials are copyright protected and are the property of Guru Eswaralayam Charitable Trust. Please contact us at admin@gurueswaralayam.com for permission to use our copyrighted materials.
* Unauthorized use and/or duplication of these images and materials without written permission from this blog’s authors and owners is prohibited. Excerpts and links may be used, provided that credit is given to Guru Eswaralayam Charitable Trust, with appropriate and specific direction to the original content.

Get real time updates directly on you device, subscribe now.

Call Now Button